11 სექ 2019 16:32 451

„ინტრიგების ფონზე მოგებას ფასი აღარ აქვს“ - ზაზა ურუშაძე კინოაკადემიის პრეზიდენტის თანამდებობას ტოვებს

 

 

რეჟისორი ზაზა ურუშაძე საქართველოს კინოაკადემიის პრეზიდენტის თანამდებობას ტოვებს. ამის შესახებ, მან განცხადებით უკვე მიმართა კინოაკადემიის წევრებს.

“კოლეგებო, ბოლო დროს განვითარებული თქვენთვის კარგად ცნობილი მოვლენებიდან გამომდინარე, რამაც ჩემთვის მიუღებელი ფორმა მიიღო, გადავწყვიტე, რომ გადავდგე და დღეიდან ვტოვებ თანამდებობას. არანაირი სურვილი აღარ მაქვს, მონაწილეობა მივიღო იმ არაჯანსაღ პროცესებში, რომლებიც ბოლო დროს განვითარდა კინოაკადემიაში და პრინციპულად მიუღებელია ჩემთვის. ნათლად გავაცნობიერე, რომ ურთიერთდაპირისპირებისა და ინტრიგების ფონზე მოგებას ფასი აღარ აქვს. მინდა, მადლობა გადავუხადო კინოაკადემიის თითოეულ თანამშრომელს, რომლებმაც მართლაც შესანიშნავად, პროფესიონალურად იმუშავეს. მადლობელი ვარ ჩემი მხარდამჭერების და ბოდიშს ვუხდი იმ ადამიანებს, რომლებსაც ჩემმა ამ გადაწყვეტილებამ შესაძლოა, იმედი გაუცრუოს. და ბოლოს - ჩემი აზრით, აუცილებელია კინოაკადემიის გაახალგაზრდავება, რაც შეიძლება, მეტი ახალგაზრდა უნდა გაწევრიანდეს ამ ორგანიზაციაში, რადგან, დარწმუნებული ვარ, სწორედ ამ შემთხვევაში ექნება პერსპექტივა საქართველოს კინოაკადემიას. პატივისცემით, ზაზა ურუშაძე“, - ნათქვამია რეჟისორის მიერ გავრცელებულ განცხადებაში. ცნობისთვის, საქართველოს კინოაკადემიაში 2 აგვისტოს რიგგარეშე ყრილობა არ შედგა.

კინოაკადემიის წევრების ხმაურიანი შეხვედრა რამდენიმე საათის განმავლობაში ურთიერთბრალდებების ფონზე მიმდინარეობდა.