რატომ დააკავეს სოსო გაგაშვილის ნათესავი?

სოსო გაგაშვილის ნათესავი, ნიკოლოზ გოგაშვილი, სამართალდამცველებმა დღეს დილით, თელავში აიყვანეს.

როგორც „ინტერპრესნიუსს“ სოსო გოგაშვილის შვილმა, ნინი გოგაშვილმა განუცხადა, ნიკა გოგაშვილი თელავში დააკავეს, მეგობრებთან ერთად იყო, როცა მასთან 3 მანქანით მივიდნენ:

„იარაღი ჩვენთან ჰქონდა, რადგან პერიოდულად ჩვენთან რჩებოდა ხოლმე, თვითონ თელავში ცხოვრობს. ეს იარაღები 16 ივლისს, ჩვენი სახლიდან ამოიღეს. ნიკა გოგაშვილი სისხლის სამართლის კოდექსის 236-ე მუხლის მე-3 ნაწილით დააკავეს, რაც ცეცხლსასროლი იარაღის გასაღებას გულისხმობს, ეს აბსურდია, მას თავის სახელზე შეძენილი და გაფორმებული 3 იარაღი ჰქონდა და არ გაუსაღებია. ეს არის პოლიტიკური დევნის მიზეზი, რადგან ის სოსო გოგაშვილის ბიძაშვილია. სწორედ, ამის გამო დააკავეს ის, რაც უსამართლობა და უკანონო ქმედებაა.

…ახლა სუს-ში მოჰყავთ, ჩვენ ეს გამომძიებელმა შეგვატყობინა. აღსანიშნავია, თუ რატომ დააკავეს ის 3 თვის შემდეგ და მაშინვე არა, თუკი რაიმე უკანონო ქმედებას ჰქონდა ადგილი. ეს მუხლი 6-დან 9-წლამდე პატიმრობას ითვალისწინებს“