“კრიმინალური ავტორიტეტების” შურისძიება – ფეიქრიშვილების აფეთქების გეგმის სკანდალური დეტალები

გიორგი და დავით ფეიქრიშვილების განზრახ მკვლელობის მომზადების ბრალდებით დაკავებული 7 პირისა და მკვლელობის შესაძლო შემკვეთის შესახებ „ნიუპოსტისთვის“ დამატებითი ინფორმაცია ხდება ცნობილი.

როგორც ირკვევა, თბილისსა და ბათუმში ჩატარებული სპეცოპერაციის შედეგად საქართველოს 6 მოქალაქე აიყვანეს, სპეცოპერაცია ჩატარდა უკრაინის ქალაქ ხარკოვში, რა დროსაც უკრაინის მოქალაქე დააკავეს.

„ნიუპოსტის“ წყარო ყვება, რომ უკრაინაში ქართველი ე.წ. კრიმინალური ავტორიტეტის მიერ დაგეგმილი სადამსჯელო ოპერაციის შესახებ ძმებმა თავიანთი წყაროებით გაიგეს და ქართველი სამართალდამცავები საქმის კურსში ჩააყენეს.

შესაბამისად, სუსშივე დაიგეგმა დანაშაულებრივი ჯგუფის წევრების გამოვლენა, მათი ფარულად ჩაწერა და ბოლოს დაკავება.

აღსანიშნავია, რომ ძმები – გიორგი და დავით ფეიქრიშვილები ბოლო რამდენიმე თვის განმავლობაში სუს-ის მიერ გამოყოფილი დაცვის თანხლებით გადაადგილდებოდნენ.

„ნიუპოსტის“ ინფორმაციით, ძმებმა დაგეგმილი აფეთქების შესახებ ინფორმაცია, დაახლოებით, სამი თვის წინ შეიტყვეს. ფეიქრიშვილებმა ისიც იცოდნენ, რომ მათ ლიკვიდაციას კიევში მყოფი ე.წ. კრიმინალური ავტორიტეტის მითითებით გეგმავდნენ.

ამ დროსითვის „ნიუპოსტისთვის“ საქმის მთავარი ფიგურანტებიდან ორის ვინაობა ხდება ცნობილი – ესენია გიორგი ბიბილაური და ბექა ცინცაძე. რაც შეეხება ე.წ კრიმინალურ ავტორიტეტს, საუბარია გავლენიან ფიგურაზე ვ. ყ.-იანზე, რომელიც უკრაინაში 2011 წლიდან იმყოფება.

საქმის მასალების მიხედვით, სწორედ ბიბილურსა და ცინცაძეს შეხვდა უკრაინის მოქალაქე, მათ გადასცა ე.წ. კრიმინალური ავტორიტეტის ვ.ყ-ს დანაბარები და თბილისში, კონსპირაციულ ბინაში დაწყო ფეიქრიშვილების გადაადგილების მარშრუტის შედგენა და მათი აფეთქების სქემაზე მუშაობაც.

რაც შეეხება მკვლელობის მოტივს, „ნიუპოსტის“ წყარო შურისძიებას ასახელებს და ამბობს, რომ საქმე გვაქვს, სავარაუდოდ, სოსო ჯოხაძის მკვლელობის საქმის გაგრძელებასთან, რადგან ცნობილია, რომ „ქურდებმა“ ძმებ ფექირიშვილებზე ანგარიშსწორება თბილისის ცენტრში ე.წ კრიმინალური ავტორიტეტის, გიორგი ჯოხაძის ძმის, სოსო ჯოხაძის ჩაცხრილვის შემდეგ გადაწყვიტეს.

აღსანიშნავია, რომ გიორგი და დავით ფეიქრიშვილების ავტომობილის აფეთქება გასულ წელსაც სცადეს. პირველი აფეთქება თბილისში, ვაჟა ფშაველას გამზირზე, ერთ-ერთი ძმის საცხოვრებელთან მოხდა. ფექრიშვილებს მეორედ ფალიაშვილის ქუჩაზე დაესხნენ, ორივე თავდასხმას ძმები უვნებლად გადაურჩნენ.

„ნიუპოსტის“ მკითხველისთვის ძმების გიორგი და დავით ფეიქრიშვილების გახმაურებულ კრიმინალურ საქმეებთან კავშირის შესახებ კარგად არის ცნობილი.

გიორგი ფეიქრიშვილი 4 წლის წინ ორ მეგობართან – გიორგი ყანჩაველთან და ნოდარ ნიშნიანიძესთან ერთად დააკავეს. ხმაურიანი დაკავება, ქალაქში მალევე დაუკავშირეს სოსო ჯოხაძის მკვლელობის საქმეს, რადგან ჯოხაძის მკვლელობაში მსჯავრდებული ბადუკა ნათობაძე ფექირიშვილების უახლოესი მეგობარი იყო. გიორგი ფეიქრიშვილი ჯოხაძის მკვლელობასთან კავშირს დღესაც კატეგორიულად უარყოფს, თუმცა ადასტურებს, რომ მის საცხოვრებელ სახლს პოლიცია იცავდა.

უნდა აღინიშნოს ისიც, რომ 2016 წლის სექტემბერს გიორგი ფექირიშვილთან დაკავებული გიორგი ყანჩაველი სოსო ჯოხაძის მკვლელობის დღეს, ნათობაძის ავტომობილში იჯდა.

ნიუპოსტი