"რაღაც უცნაურობა ხდება" - გია ხუხაშვილი -

ლევან ჯავახიშვილი „ალიას“ ესაუბრება ექსპერტი, გია ხუხაშვილი. – ბატონო გია, ბოლო დროს ლარი გამყარდა, მაგრამ ამავდროულად, ფასები ისევ გაიზარდა, თითქმის ყველა სახის პროდუქტზე. ლარი როცა მყარდება, სულ მცირე, ფასები არ იზრდება. რა უცნაურობასთან გვაქვს საქმე და ყველა უბედურება ჩვენ რატომ გვჭირს? – მოდით, ასე ავიღოთ, რომ ეს იყო ორმაგი დარტყმა. საქართველოს მოსახლეობის დიდი ნაწილი, უცხოეთიდან გადმორიცხული ფულით არსებობს. ფასები იზრდება, იმ გადმორიცხული ფულის მსყიდველობითი უნარიანობა მცირდება. თითქოს ლარის გამყარება კარგი უნდა იყოს, მაგრამ ჩვენ გვაქვს ორმაგი პრობლემა. ამით ვერ სარგებლობს ვერც ის, ვინც ლარში იღებს შემოსავალს, რადგან ფასები იზრდება და მათი მდგომარეობაც უარესდება და ვინც გადმორიცხული მყარი ვალუტით სარგებლობდა, მათი მდგომარეობაც გაუარესდა, რადგან ახლა, დავუშვათ, 100 დოლარს რომ ცვლიან ლარზე, უფრო ნაკლები ლარი მოსდით, ვიდრე ადრე. რთული და მძიმე ვითარებაა. ამას აქვს თავისი ობიექტური საფუძვლები, გლობალური ეკონომიკური პრობლემები, ლოჯისტიკური პრობლემები და ა.შ. თუმცა, რაც ხდება საქართველოში, მაინც უპრეცენდენტოა, ჩემი აზრით. ჯერ არ გამიგია, ეროვნული ვალუტა სადმე გამყარებულიყოს და პარალელურად, ამავდროულად, ფასები თითქმის ყველა სახის პროდუქციაზე გაზრდილიყოს. ასეთ დროს, სულ მცირე, უნდა შეჩერდეს ფასების ზრდა და ლოგიკურად, უნდა შემცირდეს, ფასებმა დაიწიოს. ამას აქვს ძალიან სერიოზული მიზეზები. საიდან არის ვალუტის შემოდინებები, რომლითაც ბალანსდება ვალუტაზე მოთხოვნილება. აქ სერიოზული კითხვის ნიშნები ჩნდება. იმდენად დახურულია ეს ინფორმაცია, რომ მე გამიჭირდება სრული ანალიზის გაკეთება ამ ინფორმაციის გარეშე. ფაქტია, რომ საიდანღაც, რაღაც თანხის სავალუტო შემოდინებები წარმოებს. რამდენად ლეგალური გზით შემოდის ეს ვალუტა, ეს არის გასარკვევი. ქეშით მოდის თუ გადმორიცხვები კეთდება, ვერ გაიგებ. მართლა რაღაც უცნაურობა ხდება. რაღაც პერიოდის შემდეგ მეტი სიცხადე გვექნება, მეტი ინფორმაცია და ამ უცნაური, სუფთა ქართული ფენომენის ახსნაც შესაძლებელი გახდება. – „სტრატეგია აღმაშენებლის“ თავმჯდომარემ, გიორგი ვაშაძემ ერთი იდეა თუ ინიციატივა წამოაყენა. საპენსიო ფონდში დაგროვილი თანხის 20 პროცენტით, სახელმწიფომ კრიპტოვალუტა შეიძინოს, დაარეზერვოს და მომავალში სოლიდურ მოგებას ნახავსო. თქვენ რას იტყვით ამაზე? – დიდი ბოდიშით, რა! სახელმწიფო კრიპტოვალუტით თამაშობდეს, სავალუტო ბირჟებზე თამაშობდეს, მე ამის წინააღმდეგი ვარ. კი, თავად გიორგი ვაშაძემ კრიპტოვალუტის შეძენით პირად წარმატებას მიაღწია და ეს კარგია, ღმერთმა ხელი მოუმართოს! ეს მისი პირადი საქმეა. ამის განზოგადება, სახელმწიფოზე გადატანა და რაღაც სახელმწიფო პროგრამად გამოცხადება მართებულად არ მიმაჩნია. სახელმწიფო სახელმწიფოა და არა კერძო კომპანია,რომელმაც ბირჟაზე უნდა ითამაშოს. გარდა ამისა, სახელმწიფოში საფინანსო სისტემა უნდა იყოს გამჭვირვალე, რასაც კრიპტოვალუტა და მისი ბაზარი არ გულისხმობს.