"ვენდეტა" – რა დავალება აქვს ზარქუას? – გაბრაზებული წალენჯიხელების პასუხები და ოპონენტების კომენტარები -

13,278

პოლიტიკოსი ირაკლი ზარქუა, 2024 წლის არჩევნებზე ქართული ოცნების სიის 72–ე ნომერია. 2020 წელს ის იგივე პარტიის სიის 41–ე ნომერი გახლდათ.

რატომ ჩამოასამოცდათორმეტა ის ქართულმა ოცნებამ, ეს ირაკლი ზარქუამ ნამდვილად ჩვენზე უკეთ იცის და თუ ოდესმე ამაზე საუბარს მოისურვებს, სიამოვნებით მოგაწვდით მის ვერსიას.

დღეს ირაკლი ზარქუა, რომელიც წალენჯიხიდანაა, წალენჯიხაში იბრძვის ქართული ოცნების გამარჯვებისთვის. წალენჯიხის დელეგატი, ილია ინჯიაა, ქართული ოცნების სიის 30–ე ნომერი, რომლის მთავარი პოლიტიკური რეგალიე ამ დროისათვის ისაა, რომ იგი მეათე მოწვევის პარლამენტარის, ბიზნესმენ ფრიდონ ინჯიას ვაჟია.

რა სტატუსით უმაგრებს ზურგს ირაკლი ზარქუა ინჯიას, მენტორის? რიგითის? – ვერ გეტყვით, მაგრამ გეტყვით იმას, რომ წალენჯიხაში, ბოლო პერიოდში უკვე ორი მინისტრი იყო სტუმრად – განათლების და ჯანდაცვის.

წალენჯიხიდან „ალიას“ არაერთი ადამიანი დაუკავშირდა, ჩვენ შევკრიბეთ მათი წერილები, ზარების ჩანაწერები, მათი ნაწილი, მსგავსი იყო და ამიტომ რამდენიმეს შემოგთავაზებთ.

გამომდინარე იქედან, რომ წალენჯიხელთა ბრაზი და წყრომა, როგორც თავად გვიყვებიან გამოიწვია დელეგატისა და მისი დამხმარე ძალის, ირაკლი ზარქუას სიტყვებმა, რომ ქართული ოცნება იგებს არჩევნებს ამ მუნიციპალიტეტში, ალია ქართული ოცნების პოლიტიკურ ოპონენტებსაც ესაუბარ ამ თემაზე და მათ კომენტარებსაც ამავე მასალაში იხილავთ,

სასჯელი, თუ ბოლო შანსი?

“როგორც ხმა დადის, ირაკლი ზარქუას დაევალა ოცნების წაგებისთვის რევანშის აღება წალენჯიხაში. მან უნდა დაამტკიცოს, რომ “გრძელი” ენის გარდა, გრძელი ხელებიც აქვს და პროევროპული განცხადებების გარდა კიდევ რაღაც შეუძლია. ამბობენ, რომ სწორედ ოცნების მიერ წალენჯიხის წაგების გამო, ჩამოაქვეითეს, ოცნება თვლის, რომ მან არ გააკეთა ყველაფერი 2021 წელს მისი გუნდის მოსაგებად. გარდა ამისა, ხმები დადის, რომ იმ შემთხვევაში, თუ წელს გამარჯვებას მოუტანს გუნდს წალენჯიხაში, მას კარგად დააჯილდოებენ. მისთვის ეს ბოლო შანსია, განსხვავებით, ილია ინჯიასგან, რომელსაც პირველი შანსი მიეცა დიდი პოლიტიკაში მოსასვლელად. უნდა ნახოთ, როგორ იქცევა ზარქუა მოსახლეობასთან შეხვედრებისას – ყოველთვის ცდილობს დაგვანახოს, რომ ის არის მთავარი. მაისურებზეც კი მიხვდები, რომ ზარქუა განსაკუთრებული და ერთი ნაბიჯით მაღლა მდგომი უნდა გამოჩნდეს. ერთი ვიდეო თავის გვერდზეც უდევს, სადაც, მოქალაქეს ეუბნება, რომ იცოდა მის პრობლემაზე და სპეციალურად მივიდა მასთან სასაუბროდ, მერე კი, ილიას გადახედა და უთხრა: – გავაკეთოთ! – ანუ, გააკეთეო. დელეგატმა როგორ უნდა გააკეთოს, რისი და ვისი სახსრებით კი გაუგებარია, მაგრამ ზარქუამ თუ უთხრა, უნდა გააკეთოს. დგას ილიაც და უქნევს ხოლმე თავს.

“ჩვენ ასე მოვდივართ” – გვეუბნება ირაკლი ილიას გასაგონად და ილიაც დგას მდუმარედ. არადა, წესით, ეს ილიამ უნდა ჰკითხოს ზარქუას, როგორ ასე მოდიხართ, ირაკლი, გზა არ დამხვდა მარტვილში და წყალი, ხალხი გაღატაკებულია, ყოველი მესამე სახლი დაკეტილი, – სადაა თითო სოფლისთვის მილიონი, უფასო ფულები, სადაა სოლარიუმები, სადაა აგუგუნებული ქარხნები? სად იყავი, ირაკლი ეს ოთხი წელი, რა გააკეთე? გარდა ევროპარლამენტარებისთვის ჩათ@ახის დაძახების, გარდა იმისა, რომ თითუყუშივით იმერებ, რომ დედა – დედაა და მამა – მამა, ხალხისთვის რა გააკეთე? – მაგრამ, ილიაც ისე აპირებს სიარულს, როგორც ირაკლი და მისი გუნდი დადიოდა”, – გვიყვება ადგილობრივი.

არჩევნებამდე დაანონსებული მოგება

„ირაკლი ზარქუა და ილია ინჯია თავს დაგვძახიან, ჩვენ მოვიგეთ უკვე არჩევნები წალენჯიხაშიო. რა მოიგეს, სად მოიგეს, იყო უკვე არჩევნები და არ ვიცით? ანუ, არჩევნები არჩევნებამდე მოიგეს? რანაირად? ხმის მიცემა აღარაა თავისუფალი? ხმის მიცემა აღარაა ფარული? წინასწარ აქვთ დათვლილი ხმები? არავინ მოატყუონ, ხმის მიცემა ფარულია. ბლეფს თუ გვეთამაშებიან, ეგ თამაშიც ნანახი გვაქვს.

კომენტარებში ზარქუას გვერდზე, ქართული ოცნების მომხრეები წერენ – რევანშის, ვენდეტას დროაო. ხალხმა არ უთხრა უარი 3 წლის წინ ქართულ ოცნებას? გააყალბა ოპოზიციამ არჩევნები? თავად არ მიულოცა გამარჯვება ზარქუამ გია ხარჩილავას? ხოდა, ვის წინააღმდეგაა ახლა ეს ვენდეტა? საკუთარი ხალხის წინააღმდეგ? იციან მაინც ვენდეტას მნიშვნელობა? იტალიური სიტყვაა და შურისძიებას, სისხლის აღების ადათს ასახავს.

პარლამენტარია, წალენჯიხელია, ნუთუ იმდენი არ იცის, რომ თავის გვერდზე, კომენტარებში მაინც არ წაახალისოს დაპირისპირება? ესაა მშვიდობიანი გარემო?” – გვიყვება კიდევ ერთი ადგილობრივი.

წალენჯიხის მერის პირველი მოადგილე ვანო ბურდული:

ვის უცხადებენ რევანშს და ვენდეტას – წალენჯიხელ მოსახლეობას? – წალენჯიხა, როგორც ჩანს, განსაკუთრებული ტკივილი და პრობლემაა ქართული ოცნებისთვის. თვენახევარია უკვე ვხედავთ დაბურული შკოდებით ძალოვნების მობილიზაციას წალენჯიხაში.

წალენჯიხას 3 წელში აქვს 5 სერიოზული მიღწევა, რაც, წესით, ქვეყნის მასშტაბით უნდა განხორციელებულიყო:

1. პირველკლასეთა კვება, სურვილი გვქონდა მეორეკლასელთა კვების დაფინანსების, მაგრამ საერთოდ რეაგირება არ ყოფილა ჩვენს თხოვნაზე.

2. აუტიზმის ცენტრი, რომელიც ერთადერთია ქვეყანაში, რომელსაც მუნიპალიტეტი აფინანსებს, თან ისე, რომ არანაირი საათობრივი შეზღუდვა არ მოქმედებს.

3. უფასო ტრანსპორტი წალენჯიხაში.

4. საზაფხულო დასაქმება სტუდენტებისთვის.

5. ნულოვანი კორუფციაა წალენჯიხაში, ბიუჯეტი ხმარდება მხოლოდ და მხოლოდ წალენჯიხელთა საჭიროებებს და არა ქართული ოცნების მესვერურთა ჯიბეებს.

გეხსომებათ, პირველივე წელს, ჩინოვნიკებს კი არ გავუზარდეთ ხელფასები, არამედ – რიგით თანამშრომლებს; ამ სამ წელში, ბაღის თანამშრომლებს უკვე ორჯერ გაეზარდათ ხელფასი 100–100 ლარით, საბავშვო ბაღში კვებისთვის დადგენილი იყო თითო ბავშვზე 1,97 ლარი და დღეს უკვე გაზრდილია 4,60 ლარამდე, 2 წლის წინ 240 ბავშვი დადიოდა სპორტზე, დღეს – 643. ძალიან ბევრი ახალი წრე გაიხსნა, გავაუქმეთ გადასახადი და ასე მივიღეთ ბავშვთა მეტი რაოდენობა სპორტში.

ასე რომ, ამ საარჩევნოდ წალენჯიხაში ჩამოსული ძალოვნები, პოლიტიკოსები გაუკვეველი შეთავაზებებით რომ დადიან, ჩვენი ბიუჯეტიდან ამოღებულ ფულს რომ სთავაზობენ ადამიანებს ერთჯერადად – ეს უკვე ნანახი აქვს მოსახლეობას. კოვზი ნაცარში ჩაუვარდებათ, ხავსს ვერ მოეჭიდებიან.

„მე წალენჯიხელი ვარ და რაც კარგი მაქვს, წალენჯიხიდან მაქვსო, თქვა ერთხელ ზარქუამ და მინდა ვკითხო, წალენჯიხაში, სად, რომელ სახლში, რომელ უბანში, რომელ სოფელში ისწავლა, რომ ქალს ჩა@ლახი ეძახოს?

მისმა თანაგუნდელმა, ბექა ოდიშარიამ რომ ქალს საზიზღარი, გულისამრევი სიტყვები უთხრა პარლამენტში, მაშინ განაცხადა ირაკლიმ, „ვის არ შეგიგინიათ ოჯახშიო”. ოჯახში ვინ იგინება, ირაკლი? ოჯახში, რომელიც წმინდაა და ყოველ დღე წმინდა უნდა იყოს, ოჯახში, რომელსაც სიწმინდის ერთი დღე გამოვუყავით რატომღაც 21–ე საუკუნეში და დიდი ამბით აღნიშნავთ – ვინ იგინება? სად გაუგონია წალენჯიხაში ასე მიმართავდნენ ქალს? არ ვიცი, რა კარგი ისწავლა წალენჯიხიდან, მაგრამ მინდა გითხრათ, რომ ცუდი რაც აქვს, ჩვენგან, წალენჯიხელებისგან არ უსწავლია ნამდვილად“, – გვწერს წალენჯიხიდან კიდევ ერთი ამომრჩეველი.

ცალმხრივი თანადგომა

“თავზე დაგვძახის ეს დელეგატი ინჯია და უქნევს ზარქუა თავს – ჩვენ ერთმანეთს უნდა დავეხმაროთ და ერთმანეთს გვერდით უნდა დავუდგეთო. რაში უნდა დავეხმარო მე? ან თავად რაში დამეხმარება? ყანას გამითოხნის? აბა? მივიდნენ ერთთან, პრობლემა ჰქონდა 6 თვეა, ზარქუამ, ვიცოდი, რომ ეს პრობლემა გქონდა და იმიტომ მოვედიო, არჩევნებს ელოდებოდა? ეძინა 6 თვე? წინა 5 თვე არ იყო წალენჯიხელი?

რაში მედგა გვერდით მთელი ეს 12 წელი და მე რაში უნდა დავუდგე გვერდით, რომ გამდიდრდეს? აბა, ჩემი ცოლი ემიგრაციაშია წასული, რომ თბილისში სტუდენტი შვილები გავიტანოთ როგორმე და ხმის მიცემის საშუალებაც არ დაუტოვეს. ზუსტად იმის მიიღებენ, რაც ჩვენ გაგვიკეთა ოცნებამ ამ 12 წელში – ანუ, არაფერს,” – ეს კიდე ერთი წერილია წალენჯიხიდან.

უკმაყოფილებას ვერ მალავენ ოცნების ამომრჩევლებიც:

კომენტარი ირაკლი ზარქუას ფეისბუქგვერდიდან

წალენჯიხის მერის მოადგილე, ისტორიკოსი, თამარ ბელქანია:

ცენტრალური ხელისუფლება წალენჯიხაში ვერ გამოიყენებს საჯარო მოსამსახურეებს, აიპის, მერიის, ბაღის თანამშრომლებს ვერ აიძულებს მიტინგებზე სიარულს, მაგრამ, მასწავლებლები აქაც იმ დღეში არიან, რა დღეშიც სხვა რეგიონებიდან. იმიტომ რომ სკოლები განათლების სამინიტროს ექვემდებარება. ბაღის პედაგოგები გამოვსტაცეთ ხელიდან, ბაღს ისინი ვერ აკონტროლებენ. ჩამოსული იყო განათლების მინისტრი და არც პირველკლასელთა კვებით დაინტერესდა, არც იმ საგანმანათლებრლო პროექტებით, რომელიც ხორციელდება წალენჯიხაში. ჩამოვიდა არჩევნების წინ, რომ შეხვედროდა პედაგოგებს, როგორც ამომრჩეველს. ასევე ჩამოსული იყო ჯანდაცვის მინისტრი. ჯანდაცვის სამინიტროს ყველაზე ბევრჯერ მივმართეთ რეანიმობილთან დაკავშირებით, პეტიციაც შედგა – წალენჯიხაში, ისევე, როგორც ბევრ მუნიციპალიტეტში არ არის ბავშვთა ქირურგიის განყოფილება, გინეკოლოგია, ერთი ტრავმატოლოგიც არ არის… ორივე მინისტრი ჩამოვიდა მხოლოდ იმიტომ რომ მათ დაქვემდებარებაში მყოფი ადამიანების ხმები მოიპოვონ. იმ სფეროს მინისტრები ჩამოვიდნენ, რა სფეროებსაც თავად აკონტროლებენ – ჯანდაცვის და განათლების, ძალოვნები, ცხადია, ისედაც მათი კონტროლის ქვეშა.

წალენჯიხაში ღამით უფრო მეტი მოძრაობაა ავტომობილის, ვიდრე დღისით, ყველას დირექტივა მიეცა, წალენჯიხიდან ვინც იყო ჯარში, შსს–ში, ყველა ჩამოსულია, საწვავით, საჩუქრებით დარბიან, ფულს აძლევენ ადამიანებს და მიდის მოსყიდვის მცდელობები – ეს თვალშისაცემია. ამას ვერ გაექცევი.

წალენჯიხაში 47 პროცენტია სოციალურად დაუცველი. არასდროს არავის მოუკითხავს ამ ადამიანების საჭიროება. საოკუპაციო გამყოფი ხაზია, ძალიან ბევრი დევნილია. მიგდებულები არიან ხელისუფლებისგან. 3 დღეა დახურულია ფახულანის გამშვები პუნქტი, გადმოჰყავთ ის ადამიანები, რომლებიც ჰესში მუშაობენ და ისინი, რომლებიც იციან რომ მათი ამომრჩეველია. ლევან მებონიაა ჰესის დირექტორი, ოცნების კვოტით საკრებულოს წევრი. “ოქროს ხმები” გადმოაქვს ყოველ არჩევნებზე “ოცნებისთვის” ოკუპირებული აფხაზეთიდან.

ყველაფერი, რასაც ამბობენ ან აკეთებენ, წინასაარჩევნო პიარია, ილია ინჯია წელს საოკუპაციო გამყოფ ხაზზე პირველად იყო და კინაღამ ომი დაიწყო, ისე მოიქცა, ისე ახლოს მივიდა საოკუპაციო ხაზთან… მოქცევაც არ იცის. რომ კითხოთ რა არის ყველაზე მნიშვნელოვანი ვერ გეტყვით, აქაურობით არასოდეს უცხოვრია.

3 წლის წინ, როცა ხელისუფლება ჩავიბარეთ, რომ გითხრათ რამე სფერო იყო მოწესრიგებული მოგატყუებთ. ჯვარში, ქალაღარში საერთოდ არ ჰქონდა მოსახლეობას წყალი. გზები სრულიად დანგრეული – რამდენჯერ შეიძლება ერთი და იგივე ადგილას ერთი და იგივე გზა დააგო? ადამიანები მიჩვეულნი იყვნენ, რომ არაფერი კეთდება. გაწერილი იყო რომ წყალსაქაჩი შეიძინეს და არ იყო, გრეიდერი იყიდეს 160 000–ად და უკან დადიოდა. ავტოპარკი არ დაგვხდა…

ამათ არ აქვთ თავიანთი აზრები, არც წინასაარჩევნო სიტყვები, სტრატკომია, უცხოელი ექსპერტი დაწერს ამ გზავნილებს, რომლებიც უნდა გაახმოვანონ დელეგატებმა და ერთ–ერთია ასეთი გზავნილია, ფსიქოლოგიური შტურმია ადამიანებზე – აი, ჩვენ გავიმარჯვებთ. ყველა სახელმწიფო რესურსი მათ ხელშია – ფული, საჯარო მოხელეები, 3 წლის წინათაც ასე იყო და – წააგეს!

ილია ინჯიამ, რომელიც იმასაც ვერ მიხვდა რატომ დარგო ბაბუამისმა ხე და მხოლოდ ჩრდილისთვის რომ არ დაურგავს და სახლი იმიტომ დაშალა რომ ოქროს ეძებდა, იცის რა სჭირდება წალენჯიხელებს? რამდენი დევნილია წალენჯიხაში და სად ცხოვრობენ?

https://www.alia.ge/oqros-vedzebdith-da-kibe-sakuthari-khelith-davshaleth-ras-hqhveba-ilia-injia-sagvareulo-sakhlze/

ბოლო სამ წელში, შეიქმნა აბილიტაცია–რეაბილიტაციის ცენტრი, გავაძლიერეთ სტუდენტთა დაფინანსება, მაღალი აკადემიური მოსწრების სტუდენტებს მუნიციპალიტეტი აფინანსებს. საქართველოს უნივერსიტეტმა 18 სტუდენტს შეჩერებული სტატუსი აღუდგინა. ათობით პროექტი განხორციელდა – იუვენტუსის გუნდი, აიტის სწავლა, არაერთი ფესტივალი ჩატარდა, წალენჯიხის ფერისცვალების ტაძრის ათასწლოვანი თარიღი მასშტაბური აღინიშნა, 3 წიგნი გამოიცა, გარემონტდა ჭადრაკის სასახლე, ბიბლიოთეკა, მუსიკალური ცენტრი საოცარი აპარატურით შეივსო, არის ინლისური ენის შემსწავლელი წრე, სპორტის წრეები და ეს ყველაფერი უფასოდ! ამ წრეებზე დადიან სენაკიდან, ზუგდიდიდან, ოკუპირებული აფხაზეთიდან. ამ ბავშვების უკან ხომ ოჯახები დგანან, ხომ ხედავენ როგორ შეიცვალა 3 წელში რეალობა.

მიგრაციაც შენელდა, ამის მაჩვენებლია პირველკლასელთა რიცხვი – შარშან თუ იყო 186 პირველკლასელი, 285–ია წელს, თუ შესთავაზებ ისეთ სერვისებს, რომლებიც ეკონომიკურ და სოციალურ მდგომარეობას გაუუმჯობესებს, მიგრაცია ნელდება და წყდება – ეს ხომ ნათლად დავანახეთ ყველას. მოისპო ნეპოტიზმი – მერიაში და აიპებში შეუძლებელია სხვა მუნიციპალიტეტებში უპარტიო ახალგაზრდამ იმუშაოს და წალენჯიხაში, არაერთი ასეთი ახალგაზრდა დასაქმდა.

პირველკლასელთა კვება მერიამ დააფინანსა და ამ პროექტმა დაგვანახა, რომ მეორეკლასელთა კვებით უზრუნველჰყოფაც აუცილებელია, სულ რაღაც 200 000 ლარი იყო ამისათვის საჭირო. ხელისუფლებამ პასუხიც კი არ გაგვცა. ზარქუა მაშინ არ ლობირებდა ამ პროექტს, იმიტომ არ ლობირებდა, რომ ჩვენი პროექტი იყო. როგორ შეიძლება წალენჯიხელი იყო და არ გესმოდეს, რამდენად მნიშვნელოვანობა აქვს ადგილობრივი ბავშვებისა და ოჯახებისთვისთვის ამ პროექტს. მოეპარა, ბატონო, იდეა, მისად გაესაღებია და ისე დახმარებოდა ხალხს, არც მაგის წინააღმდეგნი ვიყავით. ხომ ჩამოიყვანა ჯანდაცვის მინისტრი მუნიციპალიტეტში, სადაც რეანიმობილიც არაა, სულ ნუ ახსენებენ ჩვენ პეტიციას, ისე აჩუქონ წალენჯიხას რეანიმობილი…

პრობლემა ისაა, რომ მათთვის ეს, კოალიციური მმართველობის მქონე წალენჯიხის პრეცედენტია მიუღებელი, ამას ვერ ეგუებიან. რადგან, სხვა მუნიციპალიტეტები დინებაზეა მიშვებული, ხალხი თავისთვის ცხოვრობს, მერია – თავისთვის, ცენტრალური ხელისუფლება – თავისთვის. ეს წყობა უნდათ წალენჯიხაშიც. საბედნიეროდ, წალენჯიხაში, ბოლო 3 წელში, პოლიტიკური კულტურა ისე გაიზარდა, ეს აღარ გაუვათ, თავს ნუ მოიტყუებენ.

მარტო მუშაობს და არ იცის როდის იქნება მზად?

„მე არ ვარ წალენჯიხელი, სენაკელი ვარ. ჩემმა შვილმა სპორტის, ინგლისურის შესწავლის უფასო წრეებით რომ ისარგებლოს, წალენჯიხაში დადის. წალენჯიხამ თუ მოახერხა ამ 3 წელში, რომ ახალგაზრდებს და ბავშვებს სწავლის, სპორტით დაკავების საშუალებას აძლევს, სხვა რაიონებში, 12 წელია რატომ ვერ ახერხებს იგივეს ქართული ოცნება? სენაკიდან, ზუგდიდიდან, ჩხოროწყუდან რატომ უნდა იარონ ბავშვებმა სპორტზე ან უცხო ენის შესასწავლად წალენჯიხაში? ან, ბაღის მასწავლებლებს წალენჯიხაში რომ მოემატათ 100 ლარი ხელფასზე – სხვა რაიონებს რატომ არ დარჩათ ამის თანხა? გზა არაა, წყალი არაა, განათლება, ჯანდაცვა არაა, სპორტზე ვერ გვიტარებია შვილები ჩვენ–ჩვენ რაიონებში და წალენჯიხაში ჩვენ ვიგებთ არჩევნებსო. გამოდის, მე ჩემ შვილს ისევ ვერ ვატარებ უცხო ენასა და სპორტზე? ფული ჩვენ არ შეგვარჩინეს და ახლა განათლების, სპორტის საშუალებაც ჩაგვიკლან წალენჯიხაში, რომ სულ მთლად დაიცალოს სამეგრელო…”, – გვწერენ ამჯერად უკვე სენაკიდან.

კიდევ ერთი ამომრჩეველი წალენჯიხიდან:

„სხვათა შორის, ირაკლი ზარქუა მართლა კარგად მუშაობს, კი, მაგალითად, ერთ–ერთ ბოლო პოსტზე, სოციალურ ქსელში, 6 კომენტარიდან 3 წაშლილია. ცოტა საქმეა, კომენტარების ნახევრის წაშლა?

წალენჯიხელია, პარლამენტარია, წალენჯიხაში არჩევნები მოვიგე უკვე წინასწარო იძახის ჩვენთან შეხვედრისას და მის ზოგ პოსტს ერთი კომენტარიც არ აქვს, ზოგს ერთი კომენტარი აქვს, ან – ორი. შეუძლია ახლა თქვას, რომ ხალხს არ აქვს ინტერნეტი სოფლებში და იმიტომ არ აქვს ლაიქები და კომენტარები და ქალაქიდან დაუკომენტარონ, ბატონო, სულაც თბილისიდან დაუკომენტარონ, გუნდიდან დაუკომენტარონ, ოჯახიდან ბოლოს და ბოლოს, ან სანათესაოდან.

ალბათ, მარტო მუშაობს და “არ იცის როდის იქნება მზად? იმედია, ამაში ფულს არ უხდიან, ალბათ, უსასყიდლოდ მუშაობს და უფასო ყველი მარტო სათაგურშია? ალბათ, ჩუქნის ოცნებას ამ “მუშაობას” და რაკი ნაჩუქარ ცხენს კბილებს არ უსინჯავენ, რაც გამოვა, ის გამოვა? ყვავს კაკალი გავაგდებინეთ და ლუკმა გავარდეს, – ჯამში ჩავარდეს? მთელი 2 600 გამომწერი ჰყავს მის გვერდს და 500 მაინც თუ ეთანხმება აქედან, 50 კომენტარი მაინც არ უნდა ჰქონდეს? თავად ყველას და ყველაფერს ითვლიან და რაღა თავისას ვერ ითვლიან? შალვა ნათელაშვილს მათი მედიის დაკვეთით შესრულებული კვლევით 3 პროცენტიც არ აქვს მხარდაჭერა და ზარქუამ წალენჯიხაში არჩევნები მოიგოო და ამ დროს, შალვას გვერდს “სულ რაღაც” 196 000 გამომწერი ჰყავს და ზარქუას გვერდს “მთელი” 2600?

წალენჯიხაში წამლად რომ ვერ ვხედავთ არჩევნებიდან არჩევნებამდე, ეგ ერთი, ისეთ მნიშვნელოვან პროექტებში, როგორიც ჯანდაცვა, განათლებაა – პეტიცია რაზეც შევადგინეთ, რაც ვთხოვეთ მის გუნდს, არაფერში გვერდით არ დაგვიდგა, არაფერში არ დაგვეხმარა და ახლა ურცხვად გვეძახიან, არჩევნებს ვიგებო. ნუთუ, ვერ ხვდებიან, რომ ასეთი ჯიბრით და უტიფრობით კიდევ მეტად გვაბრაზებენ?”

„წუხდა ამას წინათ ზარქუა, ივანიშვილს თავის ანგარიშზე წვდომა არ აქვს და ეგ „ბესპრიდელიაო“. მოიხედე, ბიძიკო, აქეთ, :ბესპრიდელი” რა არის იცი? ეკონომიკა მხოლოდ თქვენთვის რომ დუღს. ხალხი რომ ქვეყანიდან გარბის, შობადობა რომ მცირდება, წამლის ფული რომ არ აქვს ადამიანს, წლიდან წლამდე რამდენი დედა ითხოვს სიმსივნიანი შვილისთვის თანხის აგროვებას თურქეთში სამკურნალოდ? “ბესპრიდელია” 40 წლის ადამიანი სტომატოლოგთან რომ ვერ მიდის და უკბილოდ დადის, შვილისთვის ფეხსაცმელს რომ ვერ ყიდულობს, მამისთვის – წამალს და ცოლთან ერთად, ყავის დასალევად რომ ვერ გადის ვერსად, რადგან პურის ფული თუ იშოვა, ისიც მაგარია,

მთავარი “ბესპრიდელი” რა არის, იცი? რუსეთი რომ წმინდაა და ევროკავშირი გარყვნილი, რუსეთზე რომ ცუდს ვერაფერს გათქმევინებთ და ევროპის ლანძღვაში გადაგიტყავდათ ენები. ჩვენი შეკოწიწებული ბიუჯეტიდან მმართველი გუნდის ლიდერები რომ მდიდრდებიან, მათი შვილები ევროპაში ისვენებენ და ჩვენ, თავი რომ ვირჩინოთ, იგივე უცხოეთში მუშებად რომ ვმუშაობთ.

კიდევ, ირაკლი, ბიძიკო, დედა – დედაა, მამა – მამა და ბიძინა – ივანიშვილია. არაა ეგ კაცი მამათქვენი, არა, არც თქვენი მამაა და არც ქვეყნის მამაა.”

“გახარია საქართველოსთვის” წალენჯიხის რაიონული ორგანიზაციის ხელმძღვანელი ხვიჩა მებონია:

“წალენჯიხელი ვარ და სხვათა შორის, არც ინჯიას და არც ზარქუას არ ვიცნობ. წელს შევხვდი შემთხვევით. ოცნების პროპაგანდის მთავარი ხაზია, რომ გამარჯვება გარანტირებული აქვს. ეს, ალბათ, თავის გამხნევებაა და მეორე მხრივ ნიჰილიზმის დათესვა, რომ აი, არ აქვს აზრი, მაინც მთავრობა იმარჯვებს. ამ გზით ცდილობენ მუხტი დააგდონ და არჩევნებზე აქტივობა იყოს დაბალი.

ძირითადად რასაც გვეუბნებიან ამომრჩევლები პირად საუბრებში, ძალოვანი სტრუქტურები აქტიურობენ, დაშინებაა, პასპორტებზე ნადირობა, იყო რამოდენიმე შემთხვევა, პატიმრების ოჯახებს პირდებოდნენ ვადამდე გათავისუფლებას, ან პატიმრობის ვადის შემცირებას.

ერთადერთ რამეს ითხოვენ ხალხისგან დღეს – 12 წელი საკუთარი კეთილდღეობისთვის ვიყავით და კიდევ 4 წელი მოგვეცით, კიდევ მეტად გავიუმჯობესოთ ცხოვრებაო.

წალენჯიხა ცენტრალურმა ხელისუფლებამ ისე ამოიჩემა, რომ რაღაც რევანშისტული სურვილი ნამდვილად იგრძნობა. ერთადერთი მუნიცპალიტეტია, სადაც ვერ გაიმარჯვა, სადაც საკრებულოშიც და მერიაშიც ოპოზიციაა და უნდა რეაბილიტაცია, რათა ხალხს დაანახოს, რომ თითქოს შემთხვევითი იყო ეს წაგება. ამიტომაც ჩამოყავთ ხან მინისტრები, ხან სპორტსმენები. რა აგონიაში არიან თავადაც ხედავთ. ადეკვატურობას ნამდვილად ვერ დაიჩემებენ. აგერ მათმა ლიდერმა რეპრესიები და დაჭერებიც დაანონსა. წალენჯიხელები იცინიან, არც ერთი დაპირება ივანიშვილს და ოცნებას არ აუსრულებია და რაღა ამას აასრულებენო… აი, ზარქუას და ინჯიას დაპირებაც, აქაოდა, მოვიგებთო მაგ ოპერიდანაა.

ხვიჩა მებონია, ილია ინჯია, ირაკლი ზარქუა

“როგორ წარმოუდგენია ირაკლი ზარქუას იმ მუნიციპალიტეტში მოგება, საიდანაც არაერთი ადამიანი იბრძვის უკრაინაში რუსეთის წინააღმდეგ? შანსს არ უშვებენ ხელიდან, ომში მყოფ უკრაინას არ წაკბინონ და ნეტავი, თუ იცის ზარქუამ, რომ წალენჯიხას დამეგობრებული ქალაქი ჰყავს უკრაინაში და მართლა, რეალური საჭიროებების მიხედვით უდგას გვერდით? თუ იცის, რამდენი წალენჯიხელი დაიღუპა რუსეთთან ომში, რამდენი დევნილია რუსეთის ოკუპაციის გამო წალენჯიხაში? ჩვენი წალენჯიხელები, ალიკა ცაავა, ედიშერ კვარაცხელია, უკრაინის მიწაზე ებრძოდნენ რუსეთს, იქ დაიღუპნენ. დიდება გმირებს! გამარჯვება საქართველოს!”, – ეს წერილიც წალენჯიხიდანაა.

უკრაინაში დაღუპული მებრძოლის წალენჯიხაში ჩამოსვენება

წალენჯიხელი ამომრჩეველი:

„ახლა მისი პატრონი ივანიშვილი ყველა ოპოზიციონერის გასამართლებით და დაჭერით რომ იმუქრება, ზარქუამ ნეტავი, თუ უთხრა, ბატონო ბიძინა, მაგალითად, მაგ ხაზარაძესთან ვმუშაობდი მე ნაცების დროს, 2006–2009 წელს, თიბისის ბანკში ერთ–ერთი განყოფილების უფროსადო? საერთოდაც, სრულიად მოულოდნელად, აგერ 2018 წლიდან ვარ მმართველი გუნდის წევრი, თორემ, მიშას დროს, ხაზარაძე მიხდიდა ხელფასს და ძალიანაც კმაყოფილი ვიყავიო? თუ, იქნებ უკმაყოფილო იყო და მაინც 3 წელი მუშაობდა მასთან?“

კოალიცია ძლიერი საქართველოს ერთ–ერთი ლიდერი, ლევან სამუშია:

“სამეგრელოში 2 თვეა ვარ და შემიძლია ვთქვა სამეგრელო პირწმინდად, კატასტროფულად წაგებული აქვს რუსულ ოცნებას. 2 დღეში ვნახავთ ყველანი შედეგს.

არამარტო სამეგრელო – მთელ საქართველოში აქვთ წაგებული.

თავს იმხნევებენ ეტყობა, ვინ– ვინ და მათ ყველაზე კარგად იციან, რომ წაგებული აქვთ. შანსი არ აქვთ!

მასე თავდაჯერებულად ივანიშვილი იმასაც იძახის მსოფლიოში ნომერ პირველი ეკონომიკა გვაქვსო…”

და კიდევ ერთი გზავნილი წალენჯიხიდან:

ერთ–ერთ ინტერვიუში, ირაკლი ზარქუა ამბობდა: აქ შტერი არავინააო და ბოდიში, ბატონო ირაკლი, მაგრამ პარლამენტიდან ბევრი სიშტერე მოგვისმენია, ბევრი სიშტერე, კანონის სახით გამოსულიც გვინახავს, მაგრამ წალენჯიხაში, მართლა არავინაა შტერი და ყველამ ყველაფერი ვიცით, ყველა ყველაფერს ვხედავთ.”

ჩვენს წილად, მხოლოდ იმას დავამატებთ, რომ წალენჯიხელებს, ნამდვილად სწორად უთქვამთ, თუ არც ერთი დაპირება არ აასრულეს, რაღა რეპრესიების, დაჭერების და ისევ მაგათი მოგების უნდა შეგვეშინდესო. ირაკლი ზარქუას კი ბევრი ფრთიანი და უფრთო ფრაზა აქვს, მაგრამ მოქალაქეებმა იმდენი რამ გაუხსენეს, ჩვენ მხოლოდ ერთსღა შევახსენებთ, ცოტა ხნის წინ ეკატერინე ტიკარაძეზე ამბობდა: “ადამიანურად გული დამწყდა, რადგან მას ჰქონდა ხედვა, გარკვეული რეფორმები განახორციელა, თუმცა, ის რჩება გუნდში და ამ მიმართულებით იქიდან გაგვაძლიერებს”. – ხოდა, იმ 12 წლიანი დაპირებებისა არ იყოს, საიდან გაძლიერებთ, აბა, ეკატერინე ტიკარაძე? რომელი მიმართულებით გაძლიერებთ? – თუმცა, როგორც გენებოთ, ბატონო ირაკლი, ეკატერინე ტიკარაძის მიერ ოცნების და თქვენი გაძლიერებისა იყოს და ალბათ, წალენჯიხაშიც მაგის იმედად ხართ დარჩენილნი.